أغرب 44 سؤال! @StAsk44

(( من الخاص 📩 )) 🔐 قابلت مشهورة في لندن وكلمتني تقول انت خليجي قلت ايه قالت ما عرفتني؟ وغلطتي قلت الا عرفتك قالت انا شنطتي انسرقت وابي بس 2000 يورو وحاولت اسحب وما سحب الا 900 يورو وعطيته اياها وبعد اسبوعين اتصل عليها ومقفل وبعدين جبت رقمها بطريقتي واكتشفت ان الرقم اللي عطتني دايم مقفل واتصلت على الرقم الجديد ولما سمعت صوتي عرفتني وبلكتني كيف اقدر اثبت حقي واشتكيها؟

(( من الخاص 📩 )) 🔐 ابي ادرس طب وما قدرت وما صار لي نفس في اي دراسة لأني احس بالظلم متخرجة السنة الي راحت بنسبة 99% وقدرات ٩٦ وتحصيلي ٩١ بس الظلم والله كبير ولأني بنت ماني قادرة اروح اطالب واشتكي ايش الحل ؟

(( من الخاص 📩 )) 🔐 انا كنت وحيد أمي بعد ما توفى ابوي وسويت خطأ اي طفل يسويه وضربوني اعمامي وهربت ورحت لمكة واشتغلت عند الحرم وعمري وقتها ١٤ سنة وبعدين جمعت فلوس ورحت جدة وسويت تجارة ثم رحت للرياض والحين عندي ١٩ عمارة تجارية ومتزوج وعندي ٨ اطفال وابي ارجع بس للحين خايف من ردة فعل اقاربي مع ان الخطأ الي سويته بسيط نسبيًا وهم يحسبوني ميت وامي مازالت موجودة ايش رايكم؟

(( من الخاص 📩 )) 🔐 انا موظف بقطاع خاص وراتبي ٤٦٠٠٠ وقبلها كنت في الحكومة ووصل راتبي ٣٧٠٠٠ وقدمت استقالة مشكلتي اني زورت شهادة ثالث متوسط قبل ٣٨ سنة ودخلت الثانوي بس كنت متمكن في الجامعة وجبت الثاني وكرمني أمير المنطقة الحين رصيدي ١٢ مليون واشعر بندم وخوف هل رواتبي كلها حرام وتجاراتي الي بنيتها عليها ؟

(( من الخاص 📩 )) 🔐 انا متزوج وعندي اولاد وتوظفت ضابط بمنطقة بعيده عن اهلي وماقدرت اتحمل وافكر بالفصل بس البديل ايش برايكم؟ لانه النقل مستحيل

(( من الخاص 📩 )) 🔐 انا موظف بقطاع خاص وما يتبقى من راتبي إلا حدود ١٠٠٠ ﷼ .. كيف استثمرها باستثمار بعيد المدى قليل المخاطر ارجو منكم المشورة وجزاكم الله خير . نزل هالاستفسار الله يسعدك

(( من الخاص 📩 )) 🔐 دخلت بمبلغ ١٠٠ دولار في منصة بريطانية وصارت ٢٤٠٠٠ دولار وبعدها طمعت وبعت سيارة خالي اللي موكلني عليها بدون علمه بمبلغ ١٤٠ الف ريال وبعدها اخذت قرض وحطيته وصار رصيدي ١٨ مليون في المنصة ولما حاولت اسحبها قالوا ادفع ١٠ الاف دولار علشان نحرر لك السحب

(( من الخاص 📩 )) 🔐 فيه شخص تكلم علي وشتمني وقذفني واتهمني اني اسرق مكيفات المساجد وأقسم بالله انه كاذب واني في حياتي ما عمري سرقت او نصبت لكن حقد وحسد اعماه قبل ثلاث سنين وللحين تغريداته عني في منصة X (تويتر) موجودة ابي انتقم منه اسجنه ويدفع ١٠٠ الف اقدر او لا ؟؟ وكيف

(( من الخاص 📩 )) 🔐 انا عسكري برتبة و رقيب درست والحمد لله ناقشت الدكتوراه قبل الحج في تخصص الإعلام الالكتروني ووسائل التواصل الحديثة هل افصل واروح شركة أو ادرس في الجامعة كعضو هيئة تدريس؟ المشكلة ان عملي مريح وراتبي اجمالًا حوالي ١٦ الف ريال وما ودي اغامر والتقاعد بعيد

(( من الخاص 📩 )) 🔐 انا مسافرة لوحدي بعد بكرى الجاي داخل الوطن ايش في وجهة سياحية هادية وفيها استكنان وهدوء ولو في الغربية او الجنوب افضل ايش تنصحوني

(( من الخاص 📩 )) 🔐 صدق الدحة موروث وعادات وكذا ؟ لأن أشوف فيها اشياء غلط وما تليق ولا فيها متعة مرة انتقدتها في الدوام وزعلوا علي كم واحد من الزملاء وقاطعوني قلت طيب نتناقش ورافضين!

(( من الخاص 📩 )) 🔐 سافرنا لجورجيا ورحنا لصديق واحد من الشباب وسوى لنا مندي خيل كان لذيذ وما عمري ذقت مثل طعمه هل فيه ملاحظات شرعية أو طبية على اكل لحم الخيل؟

(( من الخاص 📩 )) 🔐 انا رقيب اول تقاعدت قبل ثلاثة شهور وراتبي الحمد لله يعدي عشرة الاف كيف ارتب راتبي ومصاريفي وكيف ازيد دخلي؟ تخصصي شريعة وعندي خبرة محاماة وتعقيب

(( من الخاص 📩 )) 🔐 يا اخوي انا اصرف على الجوالات والانترنت في الشهر 14,000 ريال ابيك تسأل ايش افضل شركة تعطيني عروض على هذي الصرفية؟ وكيف اقدر استفيد منها؟

(( من الخاص 📩 )) 🔐 جاري سوداني يقول لقي 800,000 في شنطة في وادي وعرض علي اني أساعده ويعطيني ربع المبلغ وانا خفت انها جريمة بس هو امٌني لو ما ساعدته ما كأني اعرف هل فيها شي غلط لو ساعدته؟ وواضح الشنطة قديمة وملفوفة بنايلون وقماش

(( من الخاص 📩 )) 🔐 في ثلاث بنات معايا بالكلية في اغلب المحاضرات وكل وقتهم تنمر علي بدون سبب ما اعرفهم ولا عمري تكلمت معاهم واتحاشاهم ولدرجة مرتين اجي والاقي وحدة منهم شالت شنطتي ورمتها عند باب القاعة وجلست مكاني احس مو شخصيتي اشتكي واروح للقسم وكيذا وما ادري ليش هما يساوو كيذا ايش الحل بالله

(( من الخاص 📩 )) 🔐 السلام عليكم زوجي طلقني طلقتين ورجعني واهلي ما يدرون انا حامل بالشهر ٥ متزوجه من ٧ شهور انا بمنطقه واهلي بمنطقه بعيده مره اكثر من الف كيلو عني ، زوجي دايم يتهاوش معاي بسبب وبدون سبب ويخرج من البيت خاصة بالليل ، المهم مو عاجبه موضوع حملي ابداً ودايم يقول يمكن الطفل مشوه وكذا ، ما يصرف علي ابداً ويخليني اشتغل اشغال صعبه ومرهقه جداً انظف سقف جدران مطبخ كل اسبوع انظفه تنظيف عميق مره او مرتين رغم اني حامل ويخليني اصب له مويا من جركل كبير وانا حامل ، ووصلت فيه يقول لابوي انه كلب وكل ذا اهلي ما يدرون عنه وش اسوي اعتبروني اختكم ؟

(( من الخاص 📩 )) 🔐 انا ممرضة عمري ٢٤ قدمت على وظايف من سنة واجتهدت وما جاني شي وتزوجت قبل شهرين وبعدها جتني ٤ وظايف كلها رفضها زوجي مرة. مع ان اقل راتب فيها ١١ الف وانا خايفة اخسر الوظايف واخسره مع انه طيب وحنون بس امه واخواته ما يرد لهم كلمة ايش تنصحني

(( من الخاص 📩 )) 🔐 ولد اخوي فنان في كورة القدم من جد مبدع ومبدع في الرياضيات والفيزياء عمره ١٥ واخوي يقول بيدخله في نادي النصر وتزاعل معنا نقول له خله ينمي ابداعه الدراسي اول شي وش الحل؟

(( من الخاص 📩 )) 🔐 تكفى انشر الدعاء ولك أجر كل من قرأه وكل من نشره كأنه دعاه لنفسه وأهله. اللهم في يوم عرفة هذا اغفر لي وارحمني وأشفني وعافني عاجلًا غير آجل من كل ما أعاني منه ويؤلمني أو يزعجني. وأشف أمي واحفظها عمرًا طويلًا بالصحة والسعادة معنا ومع من نحب ومن تحب. آمين